Written by 
အရှေ့တောင်အာရှတွင် တရုတ်နိုင်ငံ၏ အရင်းနှီးဆုံးမဟာမိတ်ဖြစ်သော ကမ္ဘောဒီးယားနိုင်ငံသို့ ၈ နှစ်အတွင်း ပထမဆုံးအကြိမ်အဖြစ် တနင်္လာနေ့တွင် အမေရိကန်စစ်သင်္ဘောတစ်စီး ဆိုက်ရောက်လာခဲ့သည်။ ဆိပ်ကမ်းသို့ရောက် လာခြင်းသည် မကြာခဏဆိုသလို တင်းမာနေခဲ့သော ဆက်ဆံရေး ကို မြှင့်တင်ခြင်းပင် ဖြစ်သည်ဟု ကမ္ဘောဒီးယားအစိုးရက မှတ်ချက်ပြု ပြောကြားခဲ့သည်။
The USS Savannah သည် ငါးရက်ကြာခရီးအတွက် ထိုင်းပင်လယ်ကွေ့ရှိ Sihanoukville ဆိပ်ကမ်းတွင် ဆိုက်ကပ်ခဲ့သည်။ ကမ်းနီးတိုက်ခိုက်ရေးရေယာဉ် Littoral Combat Ship အမျိုးအစားဖြစ်သော The Savannah ၌ အမှုထမ်း ၁၀၃ ဦး လိုက်ပါသည်။
“ရှစ်နှစ်ကြာအပြီးမှာ အမေရိကန်ပြည်ထောင်စုက ဒီနေရာကို ပြန်လည်ရောက်ရှိလာတာဟာ အရမ်းကောင်းမွန်တဲ့ ပြန်လာမှုပါ” ဟု သင်္ဘော၏ ကွပ်ကဲရေးအရာရှိ Daniel A. Sledz က သတင်းထောက်များကို ရှင်းလင်း ပြောကြားခဲ့သည်။ သူ့နှင့် သူ့သင်္ဘောသားများကို ကမ္ဘောဒီးယားအရာရှိတစ်ဦးက ပန်းစည်းကမ်းကာ ကြိုဆိုနှုတ်ဆက်ခဲ့သည်။
အမေရိကသည် ကမ္ဘောဒီးယားနှင့် ဆက်ဆံရေးတင်းမာနေခဲ့သည်မှာ နှစ်အတော်ကြာပြီဖြစ်ပြီး နိုင်ငံရေးဖိနှိပ်မှုများနှင့် လူ့အခွင့်အရေးချိုးဖောက်မှုများအတွက် ကမ္ဘောဒီးယားအစိုးရကို ဝေဖန်ပြစ်တင်မှုများလုပ်ခဲ့သည်။ ကမ္ဘောဒီးယားသည် တရုတ်နိုင်ငံနှင့် ဆက်ဆံရေးနီးကပ်လာသည့်အပေါ် အထူးစိုးရိမ်မှုရှိနေပြီး Savannah သင်္ဘောဆိုက်ကပ်သည့်နေရာနှင့် မနီးမဝေးဖြစ်သော ထိုင်းပင်လယ်ကွေ့ရှိ ကမ္ဘောဒီးယားရေတပ်စခန်းတစ်ခုသို့ တရုတ်က သီးသန့်ဝင်ထွက်ခွင့်ရသွားနိုင်သည့်အပေါ် ဝါရှင်တန်က စိုးရိမ်မကင်းဖြစ်နေသည်။
အမေရိက၏ ဆိပ်ကမ်းဆိုက်ကပ်ခွင့် တောင်းဆိုချက်အရ စစ်သင်္ဘောအလည်အပတ်ခရီး စီစဉ်ခဲ့ခြင်းဖြစ်ပြီး နှစ်နိုင်ငံ ချစ်ကြည်ရင်းနှီးမှု ခိုင်မာစေရေးနှင့် ပူးပေါင်းဆောင်ရွက်မှုတို့ကို မြှင့်တင်သွားနိုင်မည်ဖြစ်သည်ဟု ကမ္ဘောဒီးယားနိုင်ငံတော် ကာကွယ်ရေးဝန်ကြီးဌာနက ပြီးခဲ့သည့် သီတင်းပတ်တွင် ပြောဆိုခဲ့သည်။
Ref: စီဘီအက်စ်နူးစ်