တောင်ကြီးတွင် လမ်းဘေးဈေးဆိုင် အားလုံးကိုစည်ပင်မှလိုက်လံသိမ်းဆည်း၊ နေအိမ်ခြံစည်းရိုးများအား ထုံးသုတ်ခိုင်း 

သျှမ်းပြည်မြို့တော် တောင်ကြီးတွင် လမ်းဘေးဈေးဆိုင်များအားလုံးအား စည်ပင်သာယာရေးဌာနမှ ကရိန်းကားဖြင့် လိုက်လံသိမ်းဆည်းနေပြီး လမ်းမကြီးဘေးတလျှောက်ရှိ နေအိမ်ခြံစည်းရိုးများအား မဖြစ်မနေထုံးသုတ်ခိုင်းနေကြောင်း မြို့ခံများထံမှ သတင်းရရှိသည်။

ဒီဇင်ဘာလ ၂၁ ရက်နေ့တွင် တောင်ကြီးမြို့ပေါ်ရှိ လမ်းမနှင့် လမ်းသွယ်များပါမကျန် လမ်းဘေးတွင်ဖွင့်လှစ်ရောင်းချနေသော ဈေးဆိုင်များအား စစ်ကောင်စီလက်အောက်ခံ စည်ပင်သာယာရေးဌာနမှ ကရိန်းကားဖြင့်လိုက်လံသိမ်းဆည်းနေကြောင်း မြို့ခံများကပြောသည်။ 

“လမ်းကြိုလမ်းကြားအထိ လမ်းဘေးဆိုင်တွေအကုန် ကရိန်းနဲ့တင်သွားပြီးပြီ၊ မိန်းလမ်း သုံးလမ်းလုံးက ခြံစည်းရိုးတွေလည်းအကုန်ထုံးသုတ်ခိုင်းတယ်၊ ဆိုင်တွေက ခြံဝန်းထဲမှာမဟုတ်ရင် မဖွင့်ရတော့ဘူး” ဟု အနောက်မြို့ပတ်လမ်းတွင် ဈေးဆိုင်ဖွင့်ထားသူ အသက် ၃၀ အရွယ် အမျိုးသမီးတစ်ဦးက သျှမ်းသံတော်ဆင့်ပြောကိုသည်။

ထိုသို့လိုက်လံသိမ်းဆည်း ပိတ်သိမ်းရသည့်အကြောင်းအရင်းမှာ လမ်းဘေးဈေးသည်ပပျောက်ရေး စီမံချက်ကြောင့် လိုက်လံပိတ်သိမ်းနေခြင်းဖြစ်ကြောင်းလည်း သိရသည်။ 

“ဝန်ကြီးက အမိန့်ချထားလို့ ရဲတွေ ရာထူးကြီးတွေတောင် ဝင်ပါလို့မရဘူးလို့ပြောတယ်၊ ပထမရက်က အုပ်စုလိုက်လာပြောတယ်၊ နောက်ရက်ဆိုင်နေရာမဖယ်ရသေးတော့ ကရိန်းနဲ့လာတာ၊ နောက်ရက်လည်း လူကြီးတစ်ယောက် အငယ်တစ်ယောက်လာထပ်ပြောတယ်” ဟု ၎င်းအမျိုးသမီးမှ ဆက်ပြောသည်။

ထိုသို့ လမ်းဘေးဈေးဆိုင်များအား လိုက်လံသိမ်းဆည်းပိတ်သိမ်းခြင်းကြောင့် ကြပ်တည်းနေသော အခြေခံလက်လုပ်လက်စား ပြည်သူများအတွက် ဝင်ငွေရရှိနိုင်ရန်ပိုမိုခက်ခဲသွားစေပြီး ဆင်းရဲကြပ်တည်းမှုများ ပိုဆိုးလာမည်ဖြစ်ကြောင်း လမ်းဘေးဈေးသည်များထံမှသိရသည်။ 

မြို့နယ်သာယာလှပရေးအကြောင်းပြပြီး လမ်းဘေးဈေးဆိုင်များအား လိုက်လံသိမ်းဆည်နေသော်လည်း အနောက်မြို့ပတ်လမ်းတွင် လမ်းပျက်စီးမှုများအား လာရောက်ပြင်ဆင်ခြင်းမရှိဘဲ ပျက်စီးနေခြင်းကြောင့် ယာဉ်တိမ်းမှောက်မှုများပါရှိနေကြောင်း သိရသည်။​

ပြီးခဲ့သည့် အောက်တိုဘာလ (၂၇) ရက်တည်းက တောင်ကြီးမြို့အတွင်း စစ်ကောင်စီလက်အောက်ခံ မြို့နယ်စည်ပင်သာယာရေးဌာနမှ  နေအိမ်ခြံဝန်းများအား မဖြစ်မနေဆေးသုတ်ရန် အမိန့်စာထုတ်ပြန်ခဲ့ပြီး လိုက်နာဆောင်ရွက်ခြင်းမရှိပါက အရေးယူမည်ဟု ထိုအမိန့်စာထဲတွင် ဖော်ပြခဲ့သည်။

မြန်မာနိုင်ငံအတွင်း စစ်အာဏာသိမ်းပြီးချိန်မှစ၍ စစ်ကောင်စီကြီးစိုးသော တောင်ကြီးကဲ့သို့မြို့ကြီးများတွင် အစိုးရဌာနဆိုင်ရာများမှ စစ်ကောင်စီခေါင်းဆောင်များအလိုကျ ပြည်သူများ၏ အခက်အခဲများအား လစ်လျှုရှုကာ ခေါင်းစဉ်အမျိုးမျိုးတို့ဖြင့် ပြည်သူများအပေါ် ဖိနှိပ်လျက်ရှိနေသည်။

အလုပ်သင် သတင်းထောက် ယူဂျင်းရေးသားသည်။