နိုင်ငံသားများသာမက ကမ္ဘာလှည့်ခရီးသည်များကိုပါ ဘတ်စ်ကား၊ ရထားနှင့် လေယာဉ် အခမဲ့စီးနင်းခွင့် ပေးထားသော ကမ္ဘာ့အချမ်းသာဆုံး နိုင်ငံငယ်လေး – iMyanmarHouse.com

ကမ္ဘာ့အချမ်းသာဆုံးနိုင်ငံဟုဆိုလျှင် လူတို့၏ စိတ်ထဲတွင် အမေရိကန်၊ တရုတ်၊ မိုနာကို အစရှိသော နိုင်ငံများ စိတ်အာရုံတွင် ဦးစွာပေါ်ပေါက်လာမည် ဖြစ်သည်။

သို့သော် ထိုနိုင်ငံတို့၏ ကြွယ်ဝမှုမှာ ဥရောပတိုက်အလယ်မှ နိုင်ငံငယ်လေးကို ဖြတ်ကျော်နိုင်ခြင်း မရှိချေ။

လပ်ဇမ်ဘာ့ဂ် (လူဇင်ဘတ်) နိုင်ငံသည် ကမ္ဘာ့အချမ်းသာဆုံးနိုင်ငံဖြစ်ပြီး ပြည်သူများကိုသာမက ကမ္ဘာလှည့် ခရီးသွားများကိုပါ လူနေမှုအဆင့် မြင့်မားမှုပေးစွမ်းနိုင်ခြင်းအပြင် အများပြည်သူသုံး သယ်ယူပို့ဆောင်ရေး စနစ်ကို အခမဲ့ အသုံးပြုခွင့်ပေးထားသည်။

လူဇင်ဘတ်၏ လူတစ်ဦးချင်းပျမ်းမျှဝင်ငွေ GDP per capita မှာ အမေရိကန်နှင့် တရုတ်ပြည်တို့ထက် မြင့်မားသည်။

နိုင်ငံတစ်ခု၏ ချမ်းသာမှုကို GDP per capita ဖြင့် တိုင်းတာခြင်း ဖြစ်သည်။

(မှတ်ချက်။ GDP ကို လူဦးရေဖြင့် စားလျှင် GDP per capita ရသည်)

ဥရောပမှ နိုင်ငံငယ်လေးဖြစ်သော လူဇင်ဘတ်မှာ ကမ္ဘာ့ကြွယ်ဝမှုညွှန်းကိန်းတွင် ထိပ်တန်းမှ အမြဲရပ်တည် လေ့ရှိသည်။

အမေရိကန်သည် ကမ္ဘာပေါ်တွင် စီးပွားရေးအင်အားအကြီးဆုံးနိုင်ငံဖြစ်သော်လည်း တစ်ဦးချင်းဝင်ငွေတွင်မူ ကမ္ဘာ့အဆင့် နံပါတ် ၉ နေရာတွင်သာ ရှိသည်။

တိုင်းပြည်တစ်ခု၏ စုစုပေါင်းစီးပွားရေးအင်အားမှာ လူတစ်ဦးချင်းကြွယ်ဝမှုကို ကိုယ်စားပြုခြင်းမရှိကြောင်း ထိုအချက်က ပြသနေသည်။

လူဇင်ဘတ်သည် ဥရောပတိုက်၏ အနောက်မြောက်ပိုင်းတွင် တည်ရှိပြီး လက်နက်နိုင်ငံကြီးများဖြစ်သော ဘယ်လ်ဂျီယံ၊ ပြင်သစ်၊ ဂျာမနီတို့နှင့် နယ်နိမိတ်ချင်း ထိစပ်နေကာ လူဦးရေမှာ ၇၀၀,၀၀၀ အောက်သာ ရှိသည်။

(လူဇင်ဘတ်သည် ကမ္ဘာပေါ်တွင် အချမ်းသာဆုံး နိုင်ငံဖြစ်သည်။ ဓာတ်ပုံ-Getty)

လူဇင်ဘတ်၏ ကြွယ်ဝမှုကို အဓိကမောင်းနှင်ပေးသည်မှာ ဘဏ္ဍာရေးဝန်ဆောင်မှုများ အလွန်အားကောင်းခြင်းကြောင့်ဖြစ်ပြီး မကြာသေးမီ ဆယ်စုနှစ်များအတွင်း တိုင်းပြည်စီးပွားရေးကို နယ်ပယ်စုံ ဖြန့်ကျက်နိုင်ခဲ့သည်။

ရင်းနှီးမြှုပ်နှံရေးဆိုင်ရာ စီမံခန့်ခွှဲမှု၊ ကမ္ဘာလှည့်ခရီးသွားလုပ်ငန်း၊ ထောက်ပံ့ပို့ဆောင်ရေးနှင့် သံမဏိထုတ်လုပ်ရေးတို့မှာ လူဇင်ဘတ်၏ GDP တွင် အရေးပါသော အခန်းကဏ္ဍမှ ပါဝင်သည်။

လူဇင်ဘတ်၏ အထူးခြားဆုံးအချက်များကို ပြောပါဆိုလျှင် အများပြည်သူ သယ်ယူပို့ဆောင်ရေးစနစ်မှာ အခမဲ့ ဖြစ်နေခြင်းလည်း ပါဝင်သည်။

လူဇင်ဘတ်တွင် ၂၀၂၀ ပြည့်နှစ်၊ ဖေဖော်ဝါရီလမှ စတင်ပြီး ဘတ်စ်ကား၊ ရထားနှင့် အများပြည်သူ သယ်ယူပို့ဆောင်ရေးစနစ်အားလုံးမှာ ပြည်သူများသာမက ကမ္ဘာလှည့်ခရီးသည်များအတွက်ပါ အခမဲ့ ဝန်ဆောင်မှု ပေးခဲ့သည်။

ယာဉ်ကြောပိတ်ဆို့မှုကို လျှော့ချနိုင်ရန်နှင့် ရေရှည်ရပ်တည်နိုင်ရေးကို ကူညီသည့်အနေဖြင့် ထိုစနစ်ကို ဖော်ဆောင်ခဲ့ခြင်းဖြစ်ကာ လူဇင်ဘတ်တွင် ခရီးသွားလာမှု ကုန်ကျစရိတ် သက်သာစေသည်။

အများပြည်သူ သယ်ယူပို့ဆောင်ရေးစနစ်မှ ပထမတန်း လက်မှတ်များမှာ အခကြေးငွေ ပေးရသော်လည်း အများစုကိုမူ အခမဲ့ ဝန်ဆောင်မှုပေးသည်။

လူဇင်ဘတ်၏ သယ်ယူပို့ဆောင်ရေးစနစ်သည် အိမ်နီးချင်းနိုင်ငံများနှင့်လည်း ကောင်းစွာချိတ်ဆက်ထားသည်။

လူဇင်ဘတ်သည် အိမ်နီးချင်း ဘယ်လ်ဂျီယံ၊ ပြင်သစ်၊ ဂျာမနီတို့နှင့် တိုက်ရိုက်ပို့ဆောင်ရေးကွန်ရက်များရှိသည်။

ဂျာမနီမှ ICE နှင့် ပြင်သစ်မှ TGV တို့ကဲ့သို့ မြန်နှုန်းမြင့် ရထားများနှင့် ချိတ်ဆက်ထားသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: The tiny European country that’s the world’s richest with free public transport (express)